Brúk fyri sambandsrødd á fólkatingi

 - Tað verður ein krossur til dóttrina, tað verður tað.

Tað segði Benny Falkenberg, tá hann var á valdi saman við dóttrini, Annu Falkenberg, sum er toppkandidatur hjá Sambandsflokkinum til fólkatingið.

 - Kenslan er góð, staðfesti Anna Falkenberg, tá ið hon var útafturkomin úr valklivanum.

 - Tað hevur verið eitt langt valstríð - tvey í einum - men vit hava gjørt ein góðan innstats sum flokkur, og vit hava havt ein øgiliga greiðan politikk, segði Anna Falkenberg.

Hon hevði ikki fult álit á annars góðu veljarakanningunum, og staðfesti, at tað er altíð verri at vinna aðru ferð.

 - Tað er brúk fyri eini rødd á fólkatingi, sum tosar ríkisfelagsskapin upp og vil nakrar reellar broytingar innanfyri tað ríkið, sum mann vil hava, segði Anna Falkenberg.