Kommunur við Skálafjørðin samstarva um eldraøkið

Kommunurnar á Skálafjørðinum avtalaðu í gjár at fara undir eina tilgongd, har tær í felag skulu skipa eldraøkið, tá tað eftir ætlan verður lagt út til kommunurnar at umsita um eitt ár.

Í uppskotinum til løgtingslóg um kommunalt samstarv á eldraøkinum, sum er lagt fyri løgtingið, verður mælt til, at kommunurnar í Eysturoy - tó ikki Eiðis- og Sunda kommunur - gerast eitt samstarvsøki.

Eysturkommuna og Fuglafjarðar kommuna hava sagt frá, at tær báðar kommunurnar eru farnar undir eina tilgongd um at skipa eldraøkið hjá sær. Sambært uppskotinum skulu kommunurnar í seinasta lagi 1. mai komandi ár hava skipað seg í kommunal samstarvsøki.

Kommunurnar hava ábyrgdina

Tá eldraøkið er lagt út til kommunurnar at umsita, eru tað kommunurnar, sum hava ábyrgdina av eitt nú heimatænastuni og eldrarøkt.

Kommunurnar skriva á heimasíðum sínum, at tíðliga næsta ár fara Runavíkar-, Sjóvar- og Nes kommuna at útgreina, hvørjar tænasturnar á eldraøkinum skulu verða, og hvussu tær skulu skipast. Útgreiningararbeiðið skal enda við eini samstarvsavtalu, sum skal verða klár at undirskriva fyri 1. mai 2014.

Kommunurnar kring Skálafjørðin samstarva longu á fleiri økjum, eitt nú barnaverndartænastuna og Skálafjarðar Kommunala Sløkkilið.