Vápnahvíld í Miðeystri

Amerikanski forsetin, Donald Trump, segði í nátt, at uppskotið hjá Iran um vápnahvíld er eitt brúkiligt útgangsstøði fyri samráðingum, og hann sigur, at hann fer at steðga álopum á Iran í tvær vikur.

Og minni enn tveir tímar seinni lækkaði prísurin á olju niður í góðar 93 dollarar fyri tunnuna. 

Trump sigur, at hann fer at steðga álopunum í tvær vikur, um Iran letur upp Hormuzsundið. 

Hann segði í gjárkvøldið okkara tíð, at USA og Iran eru vorðin samd um flestu punktini, sum ósemja var um í eini ætlan í 10 punktum.

Trump sigur, at hann hevur tosað við leiðarar í Pakistan, sum hava staðið á odda fyri samráðingunum millum Washington og Teheran. 

- Við støði í samrøðu við forsætisráðharran Shehbaz Sharif og semingsmannin Asim Munir úr Pakistan, har teir bóðu um at halda aftur oyðileggjandi kreftunum, sum skuldu sendast til Iran í gjárkvøldið, og av tí at Iran játtaði eina fullkomna og  trygga upplating av Hormuzsundinum alt fyri eitt, havi eg játtað at steðga bumbingum og álopum á Iran í tvær vikur, skrivar Trump á sosialum miðlum.

Trump um vápnahvíld

Hevur rokkið málinum 

Sambært Trump er talan um tvílanda vápnahvíld.

Hann sigur eisini, at USA hevur rokkið øllum sínum hernaðarligu málum við krígnum, og meira aftrat.

Í gjár hótti hann við, at ein heil tjóð fór at doyggja, um ikki Iran læt upp Hormuzsundið klokkan eitt í nátt okkara tíð.

Ísrael og Iran hava eisini góðtikið uppskotið um fyribils vápnahvíld, skriva CNN og Reuters.

Amerikanska verjumálaráðið heldur tíðindafund kl. eitt í dag okkara tíð.