Lærarar mugu taka vitlíki til sín

Tað eru bara trý og eitt hálvt ár síðan, at tann fyrsti sonevndi chat-botturin, ChatGPT, kom út, og fólk byrjaðu at fáa eina fatan av, hvat vitlíki er fyri nakað, men síðan hevur menningin gingið við rúkandi ferð, og vitlíki er langt síðan blivi gerandisdagur hjá børnum og ungum. Men ikki í føroyska fólkaskúlanum, og sambært Hans Fróða Jensen, varaskúlastjóra á Skúlanum á Argjahamri á Argjum, hava summir lærarar hava eisini ilt við at taka hesa nýggju kollveltandi tøknina til sín.

Tað hevur stóran týdning, at allur fólkaskúlin verður tilvitaður um, at vitlíki er komið fyri at verða, heldur hann, og at tað verður tikið við í undirvísingina - og ikki bara sum ein smartari máti enn Google at leita eftir upplýsingum.

Í seinastu útgávu av Skúlablaðnum verður sjóneykan sett á vitlíki í fólkaskúlanum, og samrøður eru við Hans Fróða Jensen og Tóra Slættalíð, námslektara í kt-didaktikki og støddfrøði á Námsvísindadeildini hjá Fróðskaparsetrinum. 

Námslektarin setur millum annað spurningin, um dagsins samfelag ikki ger tað neyðugt at menna tøknifatan sum lærugrein, og hann vísir eisini á týdningin av, at lærararnir førleikamenna seg, tá tað ræður um tøknifatan og at møta vitlíkistøknini í gerandisdegnum.

Hesum eru Hans Fróði Jensen samdur í.

Hann heldur ikki, at føroyskir lærarar ella føroyski fólkaskúlin eru verri fyri enn í grannalondunum, tí vitlíki er líka nýtt allastaðni, men røringsangist er ein orsøk til, at lærarar kanska eru eitt sindur afturhaldnir.

Møguleikin fyri at snýta til próvtøkur hevur verið nógv umrøddur, men trupulleikin er tvíbýttur, tí frameftir má vitlíki hugsast inn í fókaskúlan, so tað ikki verður so avgerandi, tá metast skal um tann einstaka næmingin.