Føroyingar vilja ferðast til Barcelona og Mallorca

Tað skal vera skjótt og lætt at koma fram, og so skal hotellið vera lekkurt.

Soleiðis hugsa flestu føroyingar, sum í summar fara uttanlands at halda frí.

Tað siga Rut Brend og Erna Jacobsen, sum arbeiða á ávikavist 62N og Fonn Flog, sum eru millum størstu føroysku ferðaskrivstovurnar.

Flestu føroyingarnir, sum fara uttanlands at halda summarfrí í ár, fara til Barcelona í Spania ella onkrar av býunum á Mallorca.

- Atlantic flýgur beinleiðis til hesi støðini, og fleiri føroyingar hava verið í Barcelona ella á Mallorca áður, so fyri fleiri er hetta skjótt og ómakaleyst, sigur Rut Brend.

Í morgunsendingini fortelja Rut Brend og Erna Jacobsen, hvussu og hvagar føroyingar helst vilja halda sína summarfrí í ár.