- Kunnu einki gera við áskoðarar, larm ella dómarar

Eini 3000 áskoðarar fara at skrála á Bosnia Hersegovina og ímóti Føroyum, tá røkkstøkk-dystur um pláss í HM-endaspælinum verður í Tuzla í kvøld.

Júst tað fara føroysku hondbóltsmenninir at leggja frá sær og heldur savna seg um egið avrik ímóti Balkan-tjóðini, segði hjálparvenjarin, Hjalti Mohr Jacobsen, júst sum føroyski hópurin var gongutúr í býnum, sum liggur í landnyrðingshorninum av landinum.

 - Vit hava fokus á, hvat vit kunnu ávirka. Vit kunnu einki gera við áskoðarar, larm og dómarar, men vit kunnu ávirka egið avrik, segði Hjalti Mohr Jacobsen.

Greitt er, at Føroyar skulu spæla uttan spælskiparin, Elias Ellefsen á Skipagøtu, og Ísak Vedelsbøl, sum báðir eru skaddir.

 - Tað ávirkar í tann mun, at tað eru aðrir, sum fáa teir minuttirnar, sum Elias annars hevði spælt, segði hjálparvenjarin. Talan er serliga um Paula Mittún, Róa Ellefsen á Skipagøtu og Bjarna í Selvindi og kanska Trónd Mikkelsen, sum annars spælir mest í verjuni.

Føroyar komu úr hægri styrkisbólki enn Bosnia Hersegovina, og eru sambært veddingarfyritøkum greiður favorittur, men tað hugsa venjarar og spælarar ikki um yvirhøvur.

 - Vit leggja ikki so nógv í odds, men vit vita, at tað kann skjótt blíva ein fysiskur og mentalur dystur, tí vit koma undir stórt trýst í kvøld, segði Hjalti Mohr Jacobsen.

Sjónvarpið hjá Kringvarpinum vísir dystin millum Bosnia Hersegovina og Føroyar. Byrjað verður at senda klokkan 18.30.