Eiga at fáa frágreiðing á hvørjum ári

Tað er ikki rætt, at landsstýrið bara skal lata løgtinginum frágreiðing um sjófeingi annað hvørt ár.

Ætlanin er at broyta lógina, sum nú sigur, at frágreiðing skal latast hvørt ár. 

Men tað er ikki rætt, heldur Eirikur í Jákupsstovu í Tjóðveldi, sum er minniluti í vinnunevndini.

Hann sigur, at stórar broytingar kunnu vera í fiskivinnuni millum ár.

Taka vit bara seinasta árið, so eru stórar broytingar hendar í fiskivinnuni.

Ov leingi at bíða

Tað er ov leingi at bíða við at viðgera tær tvey ár seinni, sigur Eiríkur í Jákupsstovu.

Hann undrast eisini á, at broytingin at hækka gildistíðina fyri veiðuloyvi upp í 10 ár ikki var í almennari hoyring.

Vinnunevndin fekk at vita frá landsstýrismanninum, at hann metti tað ikki vera neyðugt at hava hoyring, tí hann longu helt seg kenna sjónarmiðini hjá pørtunum.

Eiríkur í Jákupsstovu mælir annars til at varðveita loyvistíðina, sum er átta ár.

Les álitið frá vinnunevndini her. 

Málið kemur til aðru viðgerð á tingfundinum seinnapartin.