Trump í øðini inn á Netanyahu

Amerikanski forsetin er í øðini um, at Ísrael loypur á Iran, samstundis samráðingar eru millum USA og Iran um eina friðaravtalu.

- Vit eru ógvuliga nær við at fáa eina endaliga avtalu við Iran. Tað verður ein góð avtala. Eg vil ikki hava, at tað, sum nú hendir, ger enda á tí avtaluni, sigur Donald Trump við amerikanska miðilin Axios.

Í einari samrøðu við the Financial Times krevur amerikanski forsetin, at ísraelski forsætisráðharrin, Benjamin Netanyahu ger, sum hann sigur.

- Tað eri eg, sum ráði. Tað eri eg, sum taki allar avgerðirnar. Hann -  og her sipar forsetin tilk Benjamin Netanyahu - ræður ikki fyri nøkrum, segði Trump við Axios, og legði aftrat, at ísraelski forsætisráðharrin einki annað val hevur enn at góðtaka eina avtalu, sum USA ger við Iran.

Ísrael hevur í nátt lopið á fleiri hernaðarlig mál í Iran, skrivar ísraelski herurin á sosiala miðlinum  X.

Benjamin Netanyahu

Spreingingar í fleiri býum

Í løtuni er ikki greitt, hvar Ísrael leyp á, ella um nakar hevur fingið skaða, men sambært AFP-tíðindatovuni, sum endurgevur fleiri iranskar miðlar, hoyrdust spreingingar í trimum iranskum býum: høvuðsstaðnum Teheran, Tabriz og Isfahan.

Eisini Reuters-tíðindastovan skrivar um álopið, sum kemur bara nakrar fáar tímar eftir, at Iran sendi rakettir móti ísraelskum málum, sum hevnd fyri ísraelsku álopunum í gjár móti Beirut, høvuðsstaðnum  í Libanon. 

Tað álopið var vent móti Hizbollah í Libanon, sum Iran stuðlar.

Iranska álopið á Ísrael var sambært fleiri miðlum tað ógvusligasta brotið á vápnahvíldina, sum Iran gjørdi við USA og Ísrael í apríl.