Trygdin haltar: Eigur ikki at vera so trupult

Tað er eitt krav, at arbeiðsgevarar fylgja eini HTU-ætlan á ein og hvørjum arbeiðsplássi.

HTU stendur fyri heilsu, trygd og umhvørvi, og tað er ikki trupult at fylgja eini tílíkari ætlan, spyrt tú Djóna Eidesgaard, HTU-leiðara hjá Landsverki.

Kortini haltar trygdin í nógvum førum á arbeiðsplássum runt í Føroyum.

Trygdin skal skjalførast

HTU-ætlanin er eitt skjal, sum kann tillagast til tað arbeiðið, sum fer fram á einum ávísum arbeiðsplássi. 

- Hon umsetur tær lógur og kunngerðir okur hava innan fyri heilsu, trygd og umhvørvi, og vísir á, hvussu mann eigur at bera seg at í samband við tey ymisku viðurskiftini, sigur Djóni Eidesgaard

Uppgávan at fylgja og skjalføra trygdina á einum arbeiðsplássi kann bjóðast út, men tað er altíð byggiharrin, sum hevur evstu ábyrgd.

Ikki ein trupul uppgáva

Hetta er ikki ein trupul ætlan at fylgja, spyrt tú HTU-leiðaran.

- Tað meta okur ikki. Okur hava jú fólk, sum hava viðkomandi førleikar til at loysa uppgávurnar, so tað síggja vit ikki sum eina avbjóðing.

Kortini vita vit at trygdin í nógvum førum haltar á arbeiðsplássum runt í Føroyum.

Og spurdur um trygdin verður tikin nóg nógv í álvara á arbeiðsplássum runt í Føroyum er svarið:

- Tá tað kemur til trygd og heilsu, so kann mann altíð taka tað meira í álvara.

Sí innslag í Degi og Viku og samrøðu við Margit Stórá, landsstýriskvinnu, sum var gestur í sjónvarpsstovuni.