Julian danskur meistari á 10.000 metrum

Julian Gregersen hevur vunnið danska meistaraheitið í 10.000 metra renning.

Langteinaúrmælingurin úr Treysti í Klaksvík kom fremstur á mál við tíðini 32.37,93 minuttir í síðsta kappingardegnum av sonevndu DM-vikuni í Herning.

Nógvi hitin gjørdi, at kappingin á breytini gjørdist sera taktisk, men við einum frálíkum síðsta kilometri upp á 2.41 min. fór Julian Gregersen avstað við DM-gullinum góð trý sekund frammanfyri næstfremsta manninum.

Harumframt endaðu føroyingar eisini nummar fýra og fimm. Ragnar Rasmussen (33.14,36) og Neli Heldarskarð (34.03,71), báðir av Argjum, komu á mál ávíkavist á 4. og 5. plássi.

Góðu úrslitini benda á, at góða gongdin hjá Juliani Gregersen og føroysku langteinarunum yvirhøvur heldur fram.