IOC: Nei til føroyskan og grønlendskan limaskap

Olympiska nevndin, IOC, sigur nei til føroyskan og grønlendskan limaskap. 

Bara sjálvstøðugir statir kunnu verða viðurkendir, og olympiska nevndin fer ikki at broyta støðu hóast áheitan úr Danmark. 

Tað sigur IOC í svari, nú Føroyar aftur royna at fáa limaskap.

- Støðan hevur verið gjørd greið, og samskifti hevur verið ógvuliga greitt, fleiri ferðir seinastu árini, skrivar IOC í svarinum. 

IOC sigur seg í 30 ár havt greiða støðu, at eitt land ikki kann hava eitt lið til OL, ella ein íðkara undir flagginum, uttan so at talan er um "eitt sjálvstøðugt land, sum er viðurkent í altjóða samfelagnum".

Málið gjørdist aktuelt aftur, nú fleiri vænta, at møguleiki er fyri, at okkara A-landslið í hondbólti kunnu spæla seg til OL. 

Ítróttasambandið setti fyri stuttum Una Holm Johannesen sum samskipara at arbeiða burturav við IOC-limaskapi.