Hevur ikki somu uppfatan sum Maud

- Eg skilji ikki, hví sáttmálin ímillum Pedagogfelagið og Fíggjarmálaráðið og Kommunala Arbeiðsgevarafelagið ikki er undirskrivaður.

Tað sigur Snorri Fjallsbak, stjóri á lønardeildini í Fíggjarmálaráðnum.

- Eg havi ikki somu uppfatan av støðuni, sum tit hava endurgivið forkvinnuna í Pedagogfelagnum fyri at hava, sigur hann.

Í gjár hevði Pedagogfelagið fund við yvir 100 álitisfólk, og tey vildu hava at vita, hví sáttmálin ikki er undirskrivaður, segði Maud Vang Hansen, forkvinna við útvarpið í gjár.

Hava biðið um fund

Pedagogfelagið hevur biðið um fund við lønardeildina, Kommunala Arbeiðsgevarafelagið og við Jørgen Niclasen, landsstýrismann í fíggjarmálum. Fundurin verður ikki fyrr enn í næstu viku, tí hesa vikuna hava vit úr at gera við øðrum, sigur Snorri Fjallsbak, stjóri á lønardeildini.

Hann vil ikki grundgeva fyri, hví hann hevur aðra uppfatan av støðuni, enn forkvinnan í Pedagogfelagnum.

Fóru á dyr

- Tá vit hittust tann 3. desember, hildu vit eisini, at vit skuldu skriva undir nýggjan sáttmála. Men tá umboðini fyri Pedagogfelagið komu at skriva undir, hugdu tey at tí eina punktinum, og hildu so á dyr.

Síðani hava vit ikki tosað saman, og eg bíði spentur eftir at fáa at vita, hvør trupulleikin er. Tað vænti eg at fáa at vita tá fundur verður í næstu viku, sigur Snorri Fjallsbak.