Verkafólk: Javnsetið øll, áðrenn tit tosa um møguleikaváttan

Tað er meira umráðandi at javnseta fólk, tá tað kemur til sjúkramelding enn at byrja at tosa um møguleikaváttanir. Tað sigur Sonja Jógvansdóttir, samskipari í Verkafólki. Summi á arbeiðsmarknaðinum fáa fulla løn undir sjúkramelding, meðan limirnir í feløgnum hjá Verkafólki í stóran mun fáa 80 prosent av lønini. 

Samgongan vil hava at mann fer frá at brúka sjúkraváttanir og til heldur at brúka tað, sum tey kalla møguleikaváttanir. Tað merkir at mann í sambandi við sjúkrameldingar skal lýsa, hvat fólk eru før fyri, heldur enn hvat tey ikki eru før fyri. Tað stendur í samgonguskjalinum. 

Sonja Jógvansdóttir sigur seg vera sinnaða at taka kjakið um møguleikaváttanir, men hon er stúrin um, at limirnir hjá Verkafólki, kunnu vera trýst at arbeiða meira, enn tey í veruleikanum eru før fyri.

Landsstýrið arbeiðir í løtuni við málinum, men vil ikki siga nakað meira um tað. 

Hoyr samrøðuna við Sonju Jógvansdóttir í tíðindunum her: