Strika krav

Mentamálaráðið ætlar at strika royndarfyrireikandi undirvísing í týskum sum upptøkukrav fyri at søkja á hugbreyt í gymnasialum miðnámi. 

Uppskot um tað er sent til hoyringar.

Kravið um royndarfyrireikandi undirvísing í týskum kom í 2023.

Nógv færri søkja nú á hugbreyt. Tey vóru 154 í 2022, 88 í fjør og í ár bara 73.

Mentamálaráðið sigur tað vera sannlíkt, at upptøkukravið um týskt hevur gjørt, at næmingar velja búskaparbreytina heldur enn hugbreytina.

Ikki grundað á fakligan áhuga, men fyri at sleppa undan kravinum um týskt. 

Næmingar, sum annars hava sterkan fakligan og persónligan áhuga fyri hugvísindum, fáa ikki møguleika at søkja inn á hugbreytina, valdu teir ikki týskt í fólkaskúlanum. 

Bárður á Lakjuni, landsstýrismaður, sigur, at samgongan hevur sett sær fyri, at upptøkukrøvini frá fólkaskúla til miðnám skulu endurskoðast. 

Málið er, at somu upptøkukrøv vera fyri allar gymnasialu breytirnar, so lokið fólkaskúlaprógv gevur atgongd til allar breytirnar í miðnámi.