Iranski uttanríkisráðharrin á veg til USA á ST-aðalfund

Iranski uttanríkisráðharrin, Abbas Araghchi, er á veg til New York á 81. aðalfundin hjá ST.

Hóast Araghchi er á diplomatiskari vitjan í USA, bendir lítið á, at viðurskiftini millum stríðandi partarnar batna.

Amerikanski forsetin, Donald Trump, hótti fyri stuttum Iran og hevur sambært Fox News sagt, at "iranar mugu taka seg saman", nú hann er í ferð við at taka avgerð um "spreingja landið í luftina," sum forsetin tók til.

Araghchi skal fyrst vitja í Katar, áðrenn hann fer til USA, skriva almennir iranskir miðlar.

Rakar búskapin meint

Kríggið í Miðeystri hevur rakt iranska búskapin meint, síðan tað byrjaði í februar, tá USA og Ísrael lupu á. 

Bruttotjóðarúrtøkan í landinum minkaði 10,1 prosent samanborið við fyrsta ársfjórðing árið fyri. Tað vil siga tíðarskeiðið frá síðst í mars til síðst í juni, sum svarar til fyrsta ársfjórðing í Iran í persiska kalendaranum.

Tað boðaði iranski hagstovan frá í gjár.