Óvissa um næmingagjøld

Løgtingsins umboðmaður hevur biðið Mentamálaráðið endurskoða heimildirnar fyri næmingagjøldum á FHS- og SIT-útbúgving og gera tær sjónligari hjá fólki.

Eftir at fólk í 2024 og 2025 vendu sær til umboðsmannin um næmingagjøld á Glasi, kannaði umboðsmaðurin tey.

Umboðsmaðurin helt ikki, tað var nóg sjónligt, at landsstýrisfólkið hevði heimilað skúlum at taka næmingagjøld.

Heldur ikki var nóg sjónligt, hvat gjøldini fevndu um ella, hvussu tey vóru góðkend. 

Mett var ikki, at heimildin fyri næmingagjøldum á FHS- og SIT-útbúgving loyvdi gjald fyri annað enn ljóstøk ella tað, sum kemur í staðin fyri ljóstøk.

Mentamálaráðið skal tryggja sær, at næmingagjøldini eru innan fyri heimildina og standa mát við útreiðslurnar, sigur Løgtingsins umboðsmaður.