Sterkir slovakar vitja: - Tað vit hava brúk fyri nú

Landsliðsvenjarin Eyðun Klakstein er ikki stúrin, nú sterka slovakiska liðið vitjar á Tórsvølli í morgin. Heldur hinvegin.

 - Eg haldi, at hetta er akkurát tað, sum vit hava brúk fyri, segði hann til venjingina hjá landsliðnum seinnapartin. 

Hann er ikki heilt nøgdur við avrikini ímóti Moldova týsdagin. 

 - Tað, sum er avgerandi er, at teir, sum spæla, geva alt, sum teir eiga, og tað saknaðu vit eitt sindur í Moldova. Vit manglaðu fimm, 10 prosent í Moldova, tað siga tølini eisini, og um vit skulu hava nakran kjans ímóti Slovakia, skulu vit upp at ringja, sum vit t.d. gjørdu í dystunum í fjørheyst ímóti Kekkia, Kroatia og Montenegro, sigur venjarin.

Dysturin, sum er hin triðji í Nations League higartil, er í annaðkvøld kl. 19.45. Kringvarpið byrjar at senda eftir Dag og Viku.