Steðgur í samráðingunum hjá Pedagogfelagnum

- Nøkur viðurskifti skulu fáast upp á pláss, áðrenn vit kunnu fara víðari við sáttmálasamráðingunum.

Tað sigur Sanna á Løgmansbø, forkvinna í Føroya Pedagogfelag.

Sáttmálarnir hjá Pedagogfelagnum við Fíggjarmálaráðið og Kommunala arbeiðsgevarafelagið fóru úr gildi 1. apríl í ár, men enn er eingin nýggj semja komin í lag.

Partarnir hava avtalað at hittast aftur í næstum.

Hoyr samrøðu við forkvinnuna í Pedagogfelagnum í úvarpstíðindunum:

Gongd í øðrum samráðingum

Eisini Føroya Lærarafelag og Felagið føroyskir sjúkrarøktarfrøðinga samráðast um nýggjan sáttmála.

Sáttmálin hjá Lærarafelagnum fór úr gildi 1. oktober í fjør og sáttmálin hjá sjúkrarøktarfrøðingunum fór úr gildi 1. januar í ár.

Jacob Eli S. Olsen

Jákup Eli S. Olsen, formaður í Føroya Lærarafelag, sigur við Kringvarpið, at gongd er í sáttmálasamráðingunum. Felagið hevur havt fund við Fíggjarmálaráðið, og avtalað er at hittast aftur um einar tvær vikur.

Óluva í Gong, forkvinna í Felagnum føroyskir sjúkrarøktarfrøðingar, sigur, at tey hava avtalað fund við Fíggjarmálaráðið fyrst í november, og at gongd er í samráðingunum.