Stórar mótmælisgongur í Italia

Stórar mótmælisgongur hava verið at sæð á gøtunum í Italia ídag.

Meira enn 100.000 fólk mótmæltu politikkin hjá høgrastjórnini hjá Giorgiu Meloni, forsætisráðharra.

Tað skrivar NRK, sum vísir til NTB-tíðindastovuna.

Mótmælisgongur vóru í meira enn 50 italskum býum, og tær størstu vóru í Róm, Milano, Napoli og Torino.

Tað var yrkisfelagið USB, sum skipaði fyri mótmælunum, men bæði skúlanæmingar og lesandi vóru eisini við.

Sambært yrkisfelagnum vóru minst ein millión fólk á gøtunum, men ósemja er um talið.

Løgreglan hevur ikki upplýst enn, hvussu nógv fólk vóru við.

Nógv løgreglufólk vóru til arbeiðis, men tað gekk sum heild friðarligt fyri seg.

Nakrir samanbrestir vóru tó millum løgregluna og mótmælisfólk í Torino og øðrum býum.