- Tíðindi, mentan og ítróttur
Andrias: - Árið hevur verið ein suksé
Endiliga eydnaðist hjá manslandsliðnum at halda nullið. Mattias Lamhauge í málinum átti stóran heiður av júst tí, men í verjuni stríddust menn óført fyri at halda moldavum úti.
Ikki minst Andrias Edmundsson, sum fór hart í hvønn nærdyst - serliga tíðliga í dystinum - og kanska var eitt sindur heppin at sleppa undan gula kortinum.
- Hetta var ordiliga deiligt. Tað var nógv, sum hekk á hesum dystinum, hvussu hann fór at enda. Men nú vit vunnu, kann mann siga, at árið hevur verið ein suksé, og nú skulu vit í playoff, at tað hava vit ikki roynt fyrr, so nú koyra vit bara á, segði verjuskansin úr Verona.
Mattias Lamhauge rósti føroysku verjuspælarunum fyri at kasta seg fyri hvønn bólt, og hann fekk rósurnar retur frá Andriasi Edmundsson.
- Hann er ein framúr góður málmaður, og tað er ikki uttan grund, at hann spælir í bestu norsku deildini, so eg haldi, at hann skal bara halda fram, segði toftamaðurin.
Áki Samuelsen hevði lagt Føroyar framum miðskeiðis í fyrra hálvleiki, men moldavar treiskaðust allan dystin og onkrar løtur stóð eisini nógv á.
- Tað brendi nógv á eina løtu, og so gjørdu vit nakrar útskiftingar, og so fingu vit takið eitt sindur og komu longur fram at spæla eina løt, og faktiskt var tað eitt sindur "stille og roligt" í endanum, helt Andrias Edmundsson, sum nú kann gleða seg til uppflytingardystir í vár.
Lutakastið verður fríggjadagin.
























