Tung ferðsla orsøk til at ferðin má lækka

Jens Johannesen, formaður í teknisku nevnd hjá Tvøroyrar býráðið, sigur, at ferðmarkið er sett niður, tí nógv tung ferðsla hevur koyrt ígjøgnum miðbýin seinastu tíðina.

Orsøkin er, at Varðin Pelagic avskipar sínar frystivørur við skipum, sum liggja á Drelnesi.

Jens Johannesen sigur, at fleiri fólk hava gjørt vart við tungu ferðsluna, og vilja hava ferðmarkið lækkað.

Arbeitt verður við at víðka havnaøkið við bedingina á Tvøroyri, tí har skal byggjast ein 25 m lang djúphavn. Jens Johannesen sigur, at arbeiðið væntandi verður liðugt í summar. Tá fer ferðslan at minka, tí farmaskipini kunnu leggja at á Tvøroyru í staðin fyri á Drelnesi.