Meira ítróttur í Vágs skúla

Skúlaárið 2013/2014 hevur Vágs skúli royndarkoyrt ítróttarbreyt fyri 8. og 9. flokk.

Í komandi skúlaári fer ítróttarbreytin eisini at fevna um 6. og 7. flokk.

Nú árið er hálvrunnið eru eftirmetingar gjørdar og úrslitini av ítróttarbreytini eru sera góð.

Ítróttarlærara-toymið vísur á, at fleiri av næmingunum, sum fyrr vístu ítróttartímunum lítlan áhuga, nú eru ágrýtin og virkin í tímunum.

Vit eru sera væl nøgd við hetta fyrsta royndarárið og hava tí í samráð við ítróttarlærarar og Vágs kommunu gjørt av at víðka um tilboðið, soleiðis at fleiri næmingar kunnu fáa ágóðan av ítróttarbreytini, sigur Óli í Hjøllum, skúlastjóri.

Góðar undirvísarar:

Tey ið taka sær av ítróttarundirvísingini eru professionell og hava nógvar royndir á hægsta stigi í ítrótti. 

Jón Bjarnason; landsliðsvenjari í svimjing, Jón Pauli Olsen, venjari hjá kvinnulandsliðnum í fótbólti, og Gurið Mortensen, hondbóltsspælari og venjari hjá VB taka sær av undirvísingini. 

Dennis Holm, borgarstjóri, fegnast um góðu royndirnar við ítróttarbreytini og at breytin nú verður víðkað til, umframt 8. og 9. flokk, eisini at fevna um 6. og 7. flokk. Vit eru í einum spennandi og mennandi samstarvi við leiðslu og lærarar í Vágs skúla, har vit hava eitt felags mál, at skapa ein so góðan skúla sum tilber, sigur borgarstjórin. 

Ítróttarbreytin í Vágs skúla fer at fevna um umleið 85 næmingar.