Harustovnurin var umleið 16.000 harur í 2013

Í yvirlitinum hjá Eyðfinni Magnussen eru í alt 7.756 harur skrásettar at vera skotnar í 2013. Men yvirlitið er ikki heilt fullfíggjað.

- Eg haldi meg kortini hava fingið fatur á flestu tølunum. Tí meti eg, at umleið 8.000 harur vórðu skotnar í alt í 2013, sigur Eyðfinn Magnussen.

Helvtin skotin

- Siga vit, at helvtin av harustovninum verður skotin á hvørjum ári, so var samlaði føroyski harustovnurin umleið 16.000 harur í 2013, sigur lektarin í lívfrøði í frágreiðingini.

Vánalig líkindi

Harulíkindini vóru vánalig í fjør. Eyðfinn Magnussen heldur, at vóru betri líkindini at skjóta, so høvdu ivaleyst munandi fleiri harur verið skotnar. Av tí sama hevði metingin av samlaða harustovninum eisini verið hægri í 2013 - ivaleyst onkunstaðni millum 20.000 og 25.000 harur.

Úti í Haga á Bjørgum

Í frágreiðingini sæst, at raskastir at skjóta haru í fjør vóru teir "Úti í Haga á Bjørgum" í Vestmanna. Teir fingu í alt 158 harur á níggju túrum. Teimum á baki komu teir í "Norðurtriðingi, Norðara pari" í Sørvági. Teir fingu í alt 158 harur á 10 túrum.