Skrivligt loyvi at skjóta grágás

Løgtingið tók undir við, at loyvt verður at skjóta grágás, sum setur seg á velt lendi. Men tingið herdi lógarbroytingina, sum Fiskimálaráðið bað um. 

Skrivligt loyvi krevst frá Jacobi Vestergaard, landsstýrismanni, fyri at skjóta. Og skjótast kann bara, um grundaðir trupulleikar kunnu ávísast. Ein treyt er, at myndugleikarnir fáa at vita, hvussu nógvar gæs eru skotnar, og myndugleikarnir skulu kunna fáa gæsnar til kanningar.

Vísindaligar teljingar

Løgtingið hevur eisini álagt landsstýrismanninum at skipa fyri kanningum og vísindaligum teljingum av grágæs.Og løgtingið samtykti eisini, at lógarbroytingin, sum gevur loyvi til at skjóta grágás, verður ikki galdandi í allar ævir, men bara í trý ár, til 1.juni i 2017.