Thor kærir Heilsufrøðiligu til Vinnukærunevndina

Partafelagið Thor hevur avgjørt at kæra Heilsufrøðiligu starvsstovuna til Vinnukærunevndina.

Tað ger felagið eftir at Heilsufrøðiliga starvsstovan staðfesti forboðið fyri at selja okkurt um 80 tons av heilfrystum toski, sum Ran hevði við av Flemish Cap fyrst í apríl, til matna. 

Hesin parturin av lastini var so stórur og feitur toskur, at ikki bar til at frysta hann í blokk, er frágreiðingin hjá Thor. Thor helt uppá, at fiskurin er fyrsta floks.

Fiskurin liggur á frystigoymslu í Klaksvík.

Heilsufrøðiliga starvsstovan kolldømdi fiskin sum mannaføði, tí hann, sambært Heilsufrøðiligu starvsstovuni, ikki er viðfarin rætt.

Og Heilsufrøðiliga starvsstovan heldur fast við sítt eftir at avgerðin hevði verið til ummælis hjá Thor.

Nú hevur Thor so avgjørt at kæra avgerðina til Vinnukærunevndina, sigur Hans Andrias Joensen, stjóri í Thor.

Teir hjá Thor vóru i øðini, tí Norðlýsið var um borð á Ran og tók myndir av lastini, tá Ran kom til Klaksvíkar fyrst í apríl.

Myndirnar vórðu almannakunngjørdar á heimasíðuni hjá Norðlýsinum.

Í tíðindaskrivi 3.apríl segði Thor seg kanna, um rættast var at melda Norðlýsið fyri ólógliga at hava útvegað sær atgongd til eitt skip hjá Thor, ella um rættast var at taka onnur stig.

Hans Andrias Joensen hevur onga viðmerking um hetta í dag.