- Tíðindi, mentan og ítróttur
Andstøðan vil hava føroyskar sáttmálar lógarfestar
<p>Manningar á føroyskum fiskiskipum undir føroyskum flaggi, sum fara at fiska makrel í summar, og manningar á móttøkuskipum í føroyskum øki skulu verða løntar samsvarandi sáttmálum, sum eru galdandi á føroyska arbeiðsmarknaðinum.</p><div><br></div><div>Tað hava andstøðutinglimirnir, Aksel V. Johannesen, Henrik Old, Høgni Hoydal og Páll á Reynatúgvu, skotið upp, nú tingið hevur triðju viðgerð av lógaruppskotunum, sum skulu stýra makrelfiskiskapinum í summar.</div><div><br></div><div>Hetta er sama broytingaruppskot, sum minnilutin í Vinnunevndini setti fram við aðru viðgerð.</div><div><br></div><div>Teir skjóta eisini upp, at fiskiskip og móttøkuskip skulu ikki fáa loyvi at fiska ella taka ímóti makreli, fyrr enn tey kunnu vátta fyri landsstýrismanninum, at tey hava sáttmálar við manningarfeløgini.</div><div><br></div><div><b>Føroyskir hýrusáttmálar</b></div><div><br></div><div>Samgongutingmenninir, Alfred Olsen, Bjarni Djurholm, Hanus Samró og Jógvan Skorheim, hava eisini eitt uppskot um lønarviðurskiftini. Teir mæla til, at manningar á skipum og móttøkuskipum undir føroyskum flaggi skulu lønast sambært "føroyskum hýrusáttmálum," sum tað stendur í uppskotinum.</div><div><br></div><div>Í minsta lagi tríggir fjórðingar av manningini skulu vera føroyingar, og útlendingar, sum hava arbeiðs- og uppihaldsloyvi í Føroyum, verða javnsettir við føroyingar, stendur í uppskotinum frá samgongutingmonnunum.</div>
