Oljudálking kundi skatt alifisk

<p>Talan er um nøkur skip og bátar sum oljan kann vera likin frá, sigur Jaspur Vang, sýslumaður. Hvørji skip ella bátar talan er um, vil hann ikki siga nakað um. Tá endurgjaldskravið er gjørt upp og frágreiðing skrivað, verður málið latið ákæruvaldinum, sigur hann.&nbsp;</p>

<p>Løgreglan bar skjótt at, eftir at boð fríggjadagin komu um, at olja var at síggja á Trongisvágsfirði. Royndir vórðu tiknar av oljuni á sjónum, og royndir vórðu eisini tiknar av olju umborð á nøkrum bátum og skipum sum vórðu sædd á leiðini har oljan rak.</p>

<p>Jaspur Vang, sýslumaður, sigur, at løgreglan síðani hevur avhoyrt partarnar í málinum, og tað arbeiðið er komið undir land. Hann væntar at endurgjaldskrav kemur, og tá tað er komið, verður málið sent ákæruvalinum, sum síðani tekur avgerð um, hvat skal henda í málinum.</p>

<p><strong>Vil ikki siga, hvør dálkaði</strong></p>

<p>Jaspur Vang vil ikki siga, hvørji skip ella bátar talan er um, tí eingin orsøk er til at leggja nakran undir nakað, sum viðkomandi ikki hevur gjørt, sigur hann. Tað var tíðliga seinnapartin fríggjadagin, at tyrlan boðaði frá, at olja rak uttarlaga á Trongisvágsfirði.</p>

<p>Oljan rak ímóti alibrúkinum hjá Faroe Farming, og fólk á alibrúkinum bað um hjálp, fyri at forða fyri, at oljan rak á brúkið. Fólk frá sløkkiliðnum á Tvøroyri fór til hjálpar, og legði einar 500 metrar av oljusperring við brúkið, so oljan ikki gjørdi fiskinum skaða.</p>

<p>Oddur Dimon, sløkkiliðsleiðari, sigur, at talan var um vanliga diselolju, og tí dampaði hon skjótt, men ein partur av oljuni rak ímóti alibrúkinum og kundi uttan iva elvt til trupulleikar hjá fiskinum.</p>

<p>Oljusperringarnar sum verða nýttar, verða bert nýttar einaferð, og oljusperringarnar sum vórðu lagdar við alibrúkið hjá Faroe Farming, kosta einar 160.000 kr. Tað játtaði Faroe Farming at rinda fyri, sigur sløkkiliðsleiðarin.</p>