Nýggj iPhone við stórum skíggja avdúkað í kvøld

Keyparar kunnu gleða seg til størri skíggja, betri battarí og valið millum eina lítla og eina stóra iPhone 6, sambært leysatíðindum

Størri skíggi enn higartil. Tað er nakað av tí, keyparar kunnu gleða seg til, tá iPhone 6 kemur í handlarnar 19. september. Á myndini iPhone 5 til vinstru og tær nýggju iPhone 6 í miðjuni og høgru

Mynd: Skíggjamynd/Martin Hajek

Bjarni Mohr

09.09.2014 - 12:45

19. september. Tað er dagurin, tá tann nýggja iPhone 6 hjá fyritøkuni Apple kann keypast í teimum stóru londunum, skrivar appleinsider.com á netinum - um leysatíðindini eru álítandi.

Tað er tó ikki vist, at nýggja iPhone 6 verður at fáa í Føroyum longu um 10 dagar, tí vanligt hevur verið, at nýggjar Apple-vørur koma eitt sindur seinni til Danmarkar.

Nýggja telefonin kemur á marknaðin við tveimum ymiskum skíggjum; 4,7 tummar ella 5,5 tummar. Til sammetingar er skíggin á iPhone 5 - ið longu er á marknaðinum - fýra tummar.

Størri battarí

Ein størri skíggi krevur eisini eitt størri battarí. Tískil verður battaríið á iPhone 6 nærum tvífalt so stórt enn á iPhone 5. Tað er ikki vist, at battaríið fer at halda longri enn nú.

Telefonin við tí minna skíggjanum fer at nevnast iPhone 6, meðan telefonin við størra skíggjanum fer at nevnast iPhone 6 Plus, vilja leysatíðindi vera við.

Apple plagar at gera nógv burturúr, tá fyritøkan kemur við nýggjum vørum. Tíðindafundurin verður sjónvarpaður beinleiðis á netinum klokkan 18 í kvøld føroyska tíð, skriva miðlar.