- Tíðindi, mentan og ítróttur
Avgerð hjá kærunevnd kostar landskassanum nógv
![](https://kvf.fo/sites/default/files/styles/grein-ovasta-mynd/public/33edddbf91c2d9fe2e921b5695bec4a5.png?itok=u6PF1iN7)
Ein avgerð hjá Kærunevndini hjá Barsilsskipanini kostar landskassanum góða hálvatriðju millión krónur í ár.
Barsilsskipanin noyðist at gera eina stóra og dýra útrokning, tí Kærunevndin hjá Barsilsskipanini í desember í fjør kolldømdi mannagongdina hjá Barsilsskipanini, tá hon roknaði út, hvussu nógvan pening fólk skuldu fáa, sum fóru í styttri barsilsfarloyvi enn ein heilan mánað.
Lógin er síðani broytt, so hon nú samsvarar við mannagongdina hjá Barsilsskipanini.
Stór eftirrokning
Men Barsilsskipanin noyðist at eftirrokna øll farloyvini av tí slagnum, sum Kærunevndin tók avgerð um, og sum eru játtað frá 6.desember í fjør, tá Kærunevndin tók sína avgerð, til 24.mai í ár, tá mannagongdin hjá Barsilsskipanini varð legaliserað.
Talan er um hálvtannaðhundrað mál.
Neyðugt verður tí at seta eitt fólk í starv hjá Barsilsskipanini í eitt ár at rokna út, hvussu nógv fólk skula hava afturat, sum fingu ov lítið, ikki bara frá 6.desember í fjør til 24.mai í ár, men eisini fimm ár aftur í tíðina.
Í eykajáttanarlógini, sum kom í løgtingið í gjár, biður Vinnumálaráðið um góða hálva triðju millión krónur til Barsilsskipanina í ár, so hon fær gjørt soleiðis, sum Kærunevndin segði.