Met í ferðafólkatalinum á flogvøllinum

Higartil í ár eru 200.314 ferðafólk komin og farin umvegis nýggju farstøðina.
Tað er góð 7 prosent meir enn somu tíð í fjør.

Bara í síðsta mánað vaks ferðafólkatalið góð 5 prosent í mun til september í fjør.

Ein orsøk er Barcelona-túrarnir, metir Vága Floghavn.

 - Tað, at Atlantic Airways í stóran mun hevur lækkað prísin og flýgur longri til eitt nú Barcelona, sær út til at hava havt eina jaliga ávirkan á eftirspurningin og ferðsluna, umframt at oljuvirksemi í summar hevur givið nakað av sær, sigur Jákup Sverri Kass, stjóri á Vága Floghavn.

Eisini hevur 2014 verið merkt av stórum vøkstri í talinum av øðrum flogførum, frá øðrum flogfeløgum. Hesi hava verið til nýtt sonevndar ad hoc leigutúrar av føroyskum og útlendskum veitarum - serliga til leigutúruar í samband við manningarskifti og annað.

Reglusemi á flogvøllinum setir eisini met ár eftir ár.

Higartil í ár er reglusemið á flogvøllinum 99,3 prosent. Hetta merkir, at 99,3 prosent av flogførunum eru komin og farin við einari seinking, ið er minni enn eitt korter. Til samanberingar var reglusemið í 2008 96,6 prosent.

Orsøkin til lutfalsligu fáu seinkingarnar og avlýsingarnar er, at flogbreytin er útbygd, nýggj innflúgvingartól og nýggjar ljósmastrar eru settar upp.
Eisini RNP-tøknin hjá Atlantic Airways hevur bøtt munandi um reglusemið, sigur Vága Floghavn í skrivi.