Samráðingar um uppsjóvarfiskin í morgin

~Í morgin byrja strandalondini aftur at togast um uppsjóvarfiskin, tað vil siga sild, makrel og svartkjaft.

Tá verða samráðingar í London. samráðingarnar um svartkjaft byrja í morgin, og mikudagin seinnapartin er ætlanin at fara í holt við norðhavssildina. Tær samráðingarnar vara til fríggjadagin.

Og týsdagin 21.oktober fara londini at samráðast um makrelin.

Føroyar hava formansskapin í samráðingunum um svartkjaft og norðhavssild.

Spenningur er um, hvat fer at henda við svartkjaftasemjuni. Tað ljóðar, at ES ætlar at siga upp avtaluna um svartkjaft, tí ES vil hava meira í sín part. ES hevur í løtuni 31 prosent av svartkjaftinum, meðan fFøroyar til samanmberingar hava 26 prosent.

Men Herluf Sigvaldsen, leiðari fyri føroysku samráðingarnevndina, hevur ongar viðmerkingar til, at ES skal hava ætlanir um at siga svartkjaftaavtaluna upp.

Tvær nýggjar frágreiðingar, sum fiskifrøðingar og havlívfrøðingar hava gjørt, fara at liggja á samráðingarborðinum hesar næstu dagarnar.

Onnur frágreiðingin er um norðhavssild og hin um svartkjaft.

Semja er millum frøðingar í øllum londunum um, at tølini í frágreiðingunum eru tey røttu tølini um tey bæði fiskasløgini.

Fiskifrøðingar mæla til at minka um fiskiskapin eftir øllum trimum fiskasløgunum.

Sambært í, sum ICES sigur, verður føroyska makrelkvotan næsta ár 27 prosent minni enn í ár.

Ein útrokning, sum felagið Nótaskip gjørdi, eftir at ICES læt strandarlondunum tilmæli sítt um uppsjóvarfiskastovnarnar næsta ár, sigur, at makrelkvotan verður góð 40.000 tons minni næsta ár.
Sambært Nótaskipum hava ES, Noreg og Føroyar bundið seg til at lurta eftir ICES frá 2015 til 2018.
Sambært Nótaskipum kunnu vit eisini vænta, at kvotan av norðhavssild minkar 35 prosent.
Og ICES mælir til at svartkjaftakvotan í 2015 verður 840.000 tons, sum eru 30 prosent minni enn kvotan, sum londini samdust um fyri 2014.