100.000 tons minni av toski í Barentshavinum

Toskakvotan í Barentshavinum minkar knappliga 100.000 tons næsta ár. 

Tað eru Noreg og Russland vorðin samd um. 

Kvotan verður 894.000 tons í 2015. Tað er kvotan, sum fiskifrøðingar mæltu til.

Kvotan verður býtt eftir sama lykli sum í ár, eisini tann parturin, sum triðjalond, so sum Føroyar, fáa.

Semja hóast boykott

Hóast Noreg og Russland boykotta hvørt annað, bar væl til at fáa semju um fiskasløgini, sum bæði londini fiska í Barentshavinum, eisini um hýsu og lodnu.

Fríggadagin, sama dagin, sum samráðingarnar um fiskin í Barentshavinum endaðu við semju, avgjørdi norska stjórnin at herða tiltøkini móti Russlandi, so norsku tiltøkini eru tey somu, sum ES setti í verk 12. september.

ES og Noreg mótmæla framferðini hjá Russlandi í Ukreina.