10 mió. kr. á donsku fíggjarlógini til FarGen

FarGen-verkætlanin, sum hevur til endamáls at ílegulesa allar føroyingar, fær nú játtaðar pengar á donsku fíggjarlógini. 

Sjúrður Skaale, fólkatingsmaður fyri Javnaðarflokkin, hevur í dag gjørt avtalu við donsku stjórnina um stuðul til FarGen-verkætlanina. Danska stjórnin játtar tilsamans 10 milliónir krónur til FarGaen.  Átta milliónir krónur verða játtaðar í 2015 og tvær milliónir í 2016. 

Ætlanin at lesa og skráseta allar arvastreingir í Føroyum hevur leingi verið í andróðri, tí eingin kapitalur fekst til verkætlanina. 

Mønustingurin kom í januar, tá ein arbeiðsbólkur í Heilsumálaráðnum mælti Karsteni Hansen, landsstýrismanni, frá at fara víðari við ætlanini.

Peningarenslið stongt

Stongt varð fyri pengarenslinum úr Heilsumálaráðnum, og tær 12 milliónir krónurnar, sum FarGen hevði brúk fyri til tess at fara undir verkætlanina, vórðu ikki játtaðar á fíggjarlógini.

Danska stjórnin hevur minst møguligan meiriluta á Fólkatingi, og atkvøðan hjá Sjúrða Skaale kann tí vera tungan á vágskálini.

Og ta støðuna hevur Sjúrður Skaale gjørt sær dælt av í samráðingunum við danska fíggjarmálaráðharran, Bjarne Corydon úr Javnaðarflokkinum. 

Meiri verður at frætta í útvarpstíðindunum.