Nýggjur formaður í Skipara- og navigatørfelagnum

Skipara- og navigatørfelagið hevur havt aðalfund í dag. Seks nevndarlimir stóðu fyri vali, og fýra teirra stillaðu ikki uppaftur, - teirra millum formaðurin, Eyðstein Djurhuus. 

Nýggja nevndin sær nú soleiðis út, at Annfinnur Garðalíð er formaður, næstformaður er Elias Zachariassen og hinir í nevndini eru Ellindur Abrahamsen, Leivur Christiansen, Ólavur Biskopstøð, Andrias Højgaard og Kristin Friis. Nývaldir í nevndina eru Niels Nielsen, Annfinn Fagraklett, Jan Haldansen og Svenning Borg. 

1.200 limir eru í Skipara og navigatørfelagnum, - helvtin av teimum eru virknir limir, sum felagið hevur sáttmála fyri, og hin helvtin eru teir, sum sigla við útlendskum skipum. Sáttmálin fyri fiskiskip er uppsagdur til at fara úr gildi við ársskiftið, og sáttmálin fyri farma- og frálandaskip kann sigast upp til 1. mars 2015.