15 vindskaðar fráboðaðir í Suðuroy

Sløkkiliðið í Vági hevur fyrrapartin fingið fráboðan um sjey vindskaðar, tá ringa veðrið rakti sunnastu oynna í landinum mánamorgunin.

- Vindeygu eru farin inn, húsaklædningar hava rivið, takplátur eru farnar á frystihúsinum og onkrar tekjur eru eisini farnar á sethúsum.

Tað var stutti samandrátturin, tá útvarpið tosaði við Gudmund Jacobsen, sløkkiliðsleiðara í Vági, í tíðindasendingini klokkan 12:20.

Eisini skaðar á Tvøroyri

Sløkkiliðið á Tvøroyri hevur eisini fingið fráboðan um vindskaðar í ódnarveðrinum fyrrapartin, sambært útvarpstíðindunum.

- Vit hava fyribils fingið fráboðan um átta vindskaðar á Tvøroyri fyrrapartin, sigur Oddur Dimon, sløkkiliðsleiðari á Tvøroyri við útvarpið.

Húsaklædningar høvdu fingið skaða og onkur lyktapeli var farin av um tvøran. Hann var vestan í ættini, og tað er ikki ringasta ættin í oynni, sambært sløkkiliðsleiðaranum á Tvøroyri.