Óvissa um vatnorku í framtíðini

<p>Landsstýrið bíðar eftir tilmæli frá Jarðfeingi. Men longu nú er greitt, at SEV fær sítt loyvi endurnýggjað. Men onnur sleppa eisini framat, sigur landsstýrismaðurin í orkumálum.</p>

<p>Formliga hevur SEV framvegis loyvi til at brúka vatnorkuna til at gera streym. Loyvið er hesa ferð longt til 28. februar. Men SEV fær longt loyvið fyribils, um eingin niðurstøða er gjørd fyri 28. februar.</p>

<p>Sambært kunngerð frá 1963 fekk SEV loyvi at nýta vatnorkuna í Streymoynni, Eysturoynni, Vágum og í Suðuroynni í 50 ár. Í 2012 bað SEV um, at loyvi varð longt 50 ár afturat.</p>

<p><strong>Loyvið er longt í fleiri umførum</strong></p>

<p>Enn hevur SEV ikki fingið formligt svar, men loyvið er longt í fleiri umførum í styttri tíðarskeið hvørja ferð, sigur Bogi Andreasen, løgtingslimur, sum setti Johan Dahl, landsstýrismanni, fyrispurning um málið.</p>

<p>Johan Dahl svarar, at Jarðfeingi skal gera Vinnumálaráðnum tilmæli um hetta málið. Jarðfeingi hevur samskifti við SEV og aðrar viðkomandi partar um tilmælið.</p>

<p>Partarnir hava fingið innlit í alla málsviðgerðina, og Bogi Andreasen, sum er næstformaður í nevndini hjá SEV, eigur at vita um hesi viðurskifti, sigur Johan Dahl</p>

<p>Hann sigur eisini, at sambært aðalendamálinum í elveitingarlógini eiga onnur enn SEV at sleppa at brúka vatnorkuna, møguliga saman við SEV.</p>

<p><strong>Krevja serstakt loyvi frá myndugleikunum</strong></p>

<p>Yvirskipað er tó ætlanin at geva SEV nýtt loyvi til verandi framleiðslu. Men ásett verður í loyvinum, at øking í framleiðsluni umframt øll nýggj framleiðsla krevja serstakt loyvi frá myndugleikunum.</p>

<p>Aðrir veitarar kunnu sostatt søkja um at sleppa at gera streym úr vatnorku, um verkætlan teirra er kappingarfør í prísi og tøkni og í tráð við eina skynsama útbygging av elskipanini.</p>

<p>Viðkomandi spurningurin er tó, hvat skal útbyggjast, og ikki hvør skal fremja hesa útbygging, sigur Johan Dahl í svari sínum. Hann sigur, at í næstum ætlar at biðja løgtingið um aðalorðaskifti um elorku.</p>