Vánalig hoyrn og sjón kann elva til skaðatilburð

Vandi fyri skaðatilburðum er munandi størri hjá eldri fólki, sum hava vánaliga hoyrn og vánaliga sjón. 

Tað vísir úrslit av ph.d ritgerð, sum Gro Gade Haanes, adjunktur á sjúkrarøktarfrøðideildini á Fróðskaparsetrinum, hevur gjørt, og sum Fróðskaparsetrið endurgevur á heimasíðuni. 

Allir sansir vikna við árunum, men serliga hoyrn og sjón eru umráðandi sansir, vísir úrslitið. 

Angist og hugtungur

Tá ið sjónin og hoyrnin eru ávirkað, eru avleiðingarnar ofta, at ein verður avbyrgdur, kennir angist og verður hugtungur, staðfestir ritgerðin. 

Størri vandi er eisini fyri, at eldri fólk eru fyri óhappi og fáa skaða, tí tey kunnu koma illa fyri í gerandisdegnum, tá sjónin ella hoyrnin eru vánalig. 

Sambært ritgerðini eru ljósviðurskifti avgerandi fyri tey eldru, sum hava vánaliga sjón. Tí ræður um at laga hesi viðurskifti til tørvin hjá tí sjónveika.