ST rósar Grønlandi fyri kvinnurættindi

Grønland fekk rós frá ST, nú danska ríkið hevur staðið til svars í Geneve um kvinnurættindi.

Grønlendska landsstýrið sigur í tíðindaskrivi, at Grønland stóð royndina í rættindum hjá kvinnum. Men CEDAW-nevndin hevur tó eisini givið Grønlandi nógv tilmæli um, hvussu rættindini hjá kvinnum kunnu gerast betri. 

Mælt verður millum annað til at gera okkurt, sum forðar fyri so nógvum fosturtøkum í Grønlandi og forðar fyri harðskapi móti kvinnum. Grønland fær rós fyri javnstøðulógina, sum kom í 2013, og tí so nógvar kvinnur eru í politikki, í vinnulívinum, í skúlaverkinum og á arbeiðsmarknaðinum. 

Fýra ár ætlan

Grønlendska landsstýrið samtykti í fjør eina fýra ára ætlan, sum skal forða fyri millum annað harðskapi móti kvinnum. Tilmælini, sum Føroyar fingu frá CEDAW eftir royndina í Geneve 24. februar, vóru millum annað at endurskoða fosturtøkulógina, og at føroyskir myndugleikar skulu virka fyri, at fleiri kvinnur gerast virknar í politikki.

Harafturat skulu føroyskir myndugleikar kunna meira um kvinnurættindasáttmálan hjá ST, styrkja rættarverjuna hjá kvinnum, sum eru fyri harðskapi, endurskoða skipanir, sum hava til endamáls at veita javnstøðu, gera fleiri kanningar um kyn og javnstøðu og at fáa til vegar og greina fleiri hagtøl um kynini bæði. 

Eisini skulu føroyskir myndugleikar royna at broyta siðbundnar fatanir um lutin hjá kvinnum og monnum í samfelagnum.

Næstu ferð, Grønland, Føroyar og Danmark skulu til roynd í kvinnurættindum, verður í 2019. Men frágreiðing um støðuna skal latast CEDAW-nevndini í 2017. Grønland og Føroyar eru við í frágreiðingini hjá Danmark.