Faroe Petroleum 560 milliónir í halli

Faroe Petroleum hevði 560 mió. kr. í halli eftir skatt í fjør. Í 2013 hevði felagið 144 mió. kr. í vinningi. 

Felagið niðurskrivaði framleiðsluognir fyri 392 mió. kr. og avskrivaði leitiloyvi fyri eina milliard og 340 mió. kr. í fjør.

Faroe Petroleum seldi olju og gass fyri eina milliard og 320 milliónir krónur í fjør.

Kortini nøgd

Hóast hallið var meira enn hálv milliard í fjør, eru tey í Faroe Petroleum nøgd. Felagið hevði góðar 940 mió. kr. í tøkum peningi við árslok. 

Felagið mentist í 2014. Millum annað roynist Pil brunnurin í Norðurhavi nógv betur enn mett var. Har eigur Faroe Petroleum fjórðingin.  

Faroe Petroleum fekk fimm nýggj loyvi í norska útbjóðingarumfarinum í fjør, og trý teirra eru í Pil økinum. 

Felagið gjørdi íløgur fyri eina milliard og 380 milliónir krónur í fjør. Og kapitalurin hjá felagnum varð hækkaður 662 milliónir í fjør summar.