Triðja góðkenning at brúka rognkelsi móti laksalús

Umhvørvisstovan hevur latið triðju góðkenningina at brúka rognkelsi móti laksalús.

Bakkafrost Farming hevur fingið loyvi at seta rognkelsi í ringarnar á Kaldbaksfirði. Loyvið er galdandi til 1.mars næsta ár.

Til ber at kæra avgerðina um umhvørvisgóðkenning til landsstýrsmannin í umhvørvismálum, sum er Jacob Vestergaard.

Fyrr í ár hava Bakkafrost Farming og Marine Harvest fingið góðkenningar frá Umhvørvisstovuni at brúka rognkelsi sum reinsifisk, ávikavist við Kunoyarnes og har norðuri í Sundalagnum. 

Eta laksalús

Rognkelsi verða brúkt at taka laksalús. Royndir hava víst, at rognkelsi eta laksalús.

Í treytunum fyri at brúka rognkelsi leggur Umhvørvisstovan serligan dent á, at alifeløgini skráseta tal og felli, og tryggja, at rognkelsini ikki sleppa úr ringunum. 

Ein onnur treyt er, at rognkelsini verða tikin, tá laksurin verður tikin.

Higartil eru bara latin fyribils, tíðaravmarkað, loyvi at seta rognkelsi í aliringar.