- Tíðindi, mentan og ítróttur
Drotningavitjan í leysum lofti
![](https://kvf.fo/sites/default/files/styles/grein-ovasta-mynd/public/9057aa72a58f454b7d8fc4ae2ae3f73e.png?itok=nAYPEJKd)
Ætlanin var, at Margretha drotning og Heindrikur, prinsur, skuldu koma á almenna vitjan í Føroyum frá 15. til 19. juni.
Men nú fólkatingsval verður 18. juni, hongur vitjanin í leysum lofti.
Danska kongshúsið ger nógv burturúr at vera politiskt óheft. Sambært grundlógini er valdið hjá drotningini avmarkað. Hon setur formliga forsætisráðharran, men drotningin er ikki virkin í politisku gongdini.
Tað er eisini siðvenja, at limirnir í kongshúsinum fara ikki á val, og tey eru sera varin ikki leggja seg út í valstríð.
Hetta var eitt nú sjónligt, tá valevnið hjá Liberal Alliance, Villum Christensen, við seinasta val læt prenta eina valplakat, har hann var avmyndaður saman við Margrethu drotning. Tá gjørdi kongshúsið greitt, at tey kongaligu vildu ikki blandast upp í valstríðið.
Løgmaður og drotningin
Tí kann tað gerast trupult hjá drotningini at koma á almenna vitjan hjá Kaj Leo Holm Johannesen - løgmanni og fólkatingsvalevni - bert fáar dagar undan valinum, og lata seg avmynda saman við føroysku fólkatingsvalevnunum.
Løgmansskrivstovan og Ríkisumboðið samskipa vitjanina hjá drotningini frá 15. til 19. juni. Á Løgmansskrivstovuni siga tey, at tað er drotningin, sum hevur boðað frá, at hon kemur á vitjan, og fyrr enn Løgmansskrivstovan fær onnur boð frá Kongshúsinum, arbeiða tey sum um, at drotningin kemur á vitjan.
Men í løtuni er ivasamt, um drotningin kemur á vitjan.
Ríkisumboðið, Dan M. Knudsen, sigur við Kringvarpið, at ríkisumboðið er farið undir at kanna, hvørja ávirkan fólkatingsvalið fær á drotningavitjanina. Enn hava tey ikki fingið endaligt svar, men roknað verður við, at út á seinnapartin fæst at vita, um Margretha drotning og Heindrikur prinsur koma til Føroya, meðan fólkatingsval verður - ella um vitjanin verður útsett ella avlýst.