Flogbóltsfinalur beinleiðis í Kringvarpinum

Í dag skulu bæði flogbóltslandsliðini hjá Føroyum, kvinnur og menn, spæla finalu ímóti Saareemaa.

Kvinnufinalan byrjar klokkan 12:30, og sambært oyggjaleikaskránni byrjar dysturin hjá monnunum klokkan 14:30.

Dystirnir verða sendir beinleiðis í Kringvarpinum. Beinleiðis frásøgn er í útvarpinum, og dystirnir verða eisini sjónvarpaðir beinleiðis á kvf.fo.

Ein breddi við leinkju til dystirnir kemur at liggja ovast á síðuni.

Føroyar í seks finalum í dag

Umframt flogbóltsfinalurnar eru Føroyar eisini í fýra øðrum finalum í dag.

Rannvá Carlsson skal spæla finaluna í badminton í einmansleiki hjá kvinnum.

Niclas Eysturoy skal spæla badmintonfinalu í einmansleiki hjá monnum.

Marna Egholm og Bjørk Herup Olsen eru í finaluni á 5.000 metrum í renning.

Og í borðtennis skulu Henrietta Nielsen og Durita F. Jensen spæla finalu í tvímansleiki.