Tikin við 100 kilo av rúsevnum

Løgregla og tollarar funnu 100 kilo av rúsevnum, tá Norröna kom til Seydisfjarðar týsmorgunin, skrivar íslendska útvarpið, RUV á heimasíðuni.

Rúsevnini vórðu funnin í einum kampingvogni hjá einum útlendskum pari, sum kom til Íslands við Norrönu gjáramorgunin, týsmorgunin.

Eitt tað størsta rúsevnamálið

Tey bæði fólkini, ið vórðu tikin við 100 kilo av rúsevnum í kampingvogninum, eru nú flutt til Reykjavíkar til avhoyringar, skrivar Ríkisútvarpið.

Talan um eitt tað størsta rúsevnamálið í Íslandi nakrantíð, sambært Ríkisútvarpinum. Løgreglan á Eysturlandinum vil ikki gera viðmerkingar til málið.

Hetta er tað næsta stóra rúsevnamálið í Íslandi í ár. Á páskum vórðu tvey ferðafólk tikin, tá tey ætlaðu at smugla 20 kilo av rúsevnum til Íslands.