Hava álit á sínum nevndarlimum í BankNordik

Nevndin í BankNordik ger av, hvussu virksemið í BankNordik skal skipast, og eisini hvør skal vera stjóri í bankanum.

Tað sigur Birita Sandberg Samuelsen, forkvinna í Fíggingargrunninum.

Landið eigur ein triðing av partabrøvunum í BankNordik, og Fíggingargrunnurin umsitur ognina hjá landinum, sum er størsti einstaki partaeigari í bankanum.

Nýggj nevnd varð vald í vár, og í gjár tók nevndin avgerð um at loysa Janus Petersen, forstjóra úr starvinum, og at seta Árna Ellefsen, kredittstjóra, sum stjóra.

Nevndin og Janus Petersen vóru ikki samd um tað sum er sett út í kortið, og tí skal ein nýggjur stjóri finnast, segði Stine Bosse, forkvinna í nevndini fyri BankNordik.

Og ta avgerðina tekur nevndin í Fíggingargrunninum til eftirtektar, sigur Birita Sandberg Samuelsen, forkvinna.

Mynd: Birita Sandberg Samuelsen er forkvinna í nevndini fyri Fíggingargrunnin