Listafólkið: Sára Maria Dalsgarð

Børn flest mála og tekna, men nógv halda uppat, eldri tey gerast. Men Sára Maria er ikki hildin uppat. Áhugin fyri at tekna og mála var ikki tilvildarligur, av tí at familja hennara hevur gjørt nógv kreativt. 

- Eg haldi, eg havi fingið íblástur frá familju míni, ið altíð hevur fingist við eitt og hvørt kreativt. Tað besta er, at eg altíð eri sloppin at mála, hóast tað kanska hevur svansað illa tá. Eg havi málað nógv hjá ommu míni, sum eisini sjálv dámar at mála.

Umráðandi at tey nærmastu vísa áhuga

Sára Maria heldur, at tað er ein fyrimunur, at tey nærmastu hava áhuga fyri tíni list. Har hevur pápi hennara víst serligan áhuga. 

- Tað er eitt slag av einum frítíðarítrívi hjá mær (enn). Eg máli fyri at koma burtur úr tí strævna gerandisdegnum. Í listini fái eg savnað tankarnar og bert miðsavnað meg um kreativitetin. 

Unga listakvinnan lýsir stílin hjá sær sum romantiskan og idylliskan, men eisini onkursvegna gátuføran. 

Sí nøkur av listaverkunum hjá Sáru Mariu niðanfyri