Landbúnaðarpolitikkur á dagsskrá

Nú skulu pengar brúkast til at orða ein nýggjan landbúnaðarpolitikk. Meirilutin í Fíggjarnevndini hjá Løgtinginum - tað eru umboðini hjá samgonguni - mæla tinginum til at seta 430.000 krónur av til økið "Almennar royndir og ráðgeving".

Pengarnir skulu brúkast til at seta gongd á at orða ein nýggjan landbúnaðarpolitikk og at fyrireika ymiskar royndir.

Lendisætlan

Landbúnaðarpolitikkurin skal millum annað fevna um at gera eina lendisætlan og at leggja eina ætlan fyri, hvussu Føroyar kunnu gerast meira sjálvbjargnar við landbúnaðarvørum, til dømis grønmeti, seyðakjøti og neytakjøti.

Eisini skal ein ætlan gerast fyri, hvussu vit kunnu fáa meira burturúr tí tilfeingi, sum í dag fer burtur, sigur meirilutin í Fíggjarnevndini.