Kristel Lisberg er við í Melodi Grand Prix

Føroyski sangarin er millum teir tíggju luttakararnar, sum kappast um at syngja besta sang í donsku sangkappingini, Melodi Grand Prix

Føroyska Kristel Lisberg er við í Melodi Grand Prix, ið verður um ein slakan mánað

Finnur Koba

10.01.2016 - 17:17

Í næsta mánaði verður danska Melodi Grand Prix, og sum vant – freistast ein til at siga – er ein føroyingur við.

Kristel Lisberg verður millum teir tíggju sangararnir, ið skulu kappast um besta danska sangin. Tað var annars ikki ætlanin, at luttakaralistin skuldi vera almennur enn.

Sangirnir komu á Spotify av misgáum

Men í dag endaðu allir 10 sangirnir á online-tónleikatænastuni Spotify. Har í millum sangurin, Who Needs A Heart, ið Kristel Lisberg syngur.

- Tað er sjálvandi keðiligt, at sangirnir eru komnir út áðrenn ætlan, men tað broytir ikki, at vit hava eina søguliga góða uppstilling til Melodi Grans Prix 2016, sigur Jan Lagnermand Lundme, undirhaldsstjóri hjá DR við Danmarks Radio.

Hesa ferð verður danska sangkappingin hildin í Forum Horsens. Vinnarin 13. februar skal dystast í evropeiska Eurovision Song Contest, sum verður hildin 10., 12. og 14. mai í Stokkhólmi.