Dráttur beina kós móti FM-finaluni

Alt bendir á, at Dráttur verður annað FM-finaluliðið í flogbóltskappingini hjá kvinnum.

Í kvøld tóku tær ímóti KÍF á Giljanesi. Undan dystinum var greitt, at KÍF mátti helst vinna, um tær framvegis skuldu hava møguleika at koma í finaluna.

Men tað bleiv Dráttur, ið vann sannførandi 3-0 sigur við settúrslitunum 25-19, 25-23 og 25-14.

Úrslitið kundi møguliga blivi eitt annað, tí eitt skifti í øðrum setti var KÍF á odda 23-19, men eisini tá vóru tær í Drátti sterkari.

Við sigrinum styrkti Dráttum um sína oddastøðu, og longu nú kann sigast, at tær verða helst annað finaluliðið. Higartil hava tær vunnið níggju dystir og bara tapt ein.

Dráttur hevur tvær ferðir vunnið FM í kvinnukappingini. Tað var í 2001 og í 2006.

myndina eigur jn.fo