Báðir undirsjóvartunlarnir avlop í 2015

Avlopið í Vágatunlinum var 300.000 krónur, sum eru 3,4 milliónir krónur minni enn árið fyri. Umsetningurin í Vágatunlinum var góðar 13 milliónir í fjør, men árið fyri var hann næstan 19 milliónir kr.

Umleið 700.000 akfør koyrdu í Vágatunlinum í fjør, 15.216 fleiri enn árið fyri. Í meðal koyrdu 1865 akfør um samdøgrið í Vágatunlinum í fjør.

Tunnilin ikki latin landinum í 2016

Á aðalfundinum í fjør, varð samtykt, at Vágatunnilin skuldi latast landinum í desember í ár. Málið er síðani umrøtt millum Henrik Old, landsstýrismann, og umboð fyri P.f Vágatunnilin,

Landsstýrismaðurin hevur boðað felagnum frá, at Vágatunnilin skal ikki latast landinum í ár, sigur Uni Danielsen, stjóri í Vágatunlinum og Norðoyatunlinum, í tíðindaskriv.

Úrslitið í P.f. Norðoyatunlinum í fjør var slakar 5 milliónir kr. í avlopi, ella 3,6 milliónir størri enn árið fyri. Umsetningurin var góðar 24 milliónir kr., eina millión meira enn í 2014.

SÍ EISINI Politisku feløgini: Tunnilsgjaldið strikast

Umleið 900.000 akfør koyrdu í Norðoyatunlinum í fjør, vøksturin er 6,6 prosent. Í meðal koyrdu 2463 akfør í Vágatunlinum í fjør. Á aðalfundinum vóru báðar nevndirnar afturvaldur.

Í nevndini fyri Norðoyatunnilin sita Jens Kári Vilhelm, Heri M. Hammer og Johanna á Bergi.

Í nevndini fyri Vágatunnilin sita Jens Kári Vilhelm, Dánjal T. Thomsen, Matthea Hilduberg og Marita Hentze. Jens Kári Vilhelm er nevndarformaður bæði í Norðoyatunlinum og Vágatunlinum.