Vil hava uppskot aftur úr fíggjarnevndini

Kári P. Højgaard, tingmaður í Nýggjum sjálvstýri, er farin at ótolnast eftir fíggjarnevndini, sum síðani í heyst hevur viðgjørt uppskotið frá Nýggjum sjálvstýri um, at allar grønar hitaskipanir, sum t.d. jarðhiti og fjarhiti, skulu sleppa undan meirvirðisgjaldi.

Og Kári P. Højgaard vil nú hava málið aftur í tingið.

Uppskotið varð lagt fyri tingið 23. oktober, og tað fekk fekk fyrstu viðgerð 3. november.

Síðani varð málið beint í fíggjarnevndina, og har hevur tað ligið síðani.

18. februar bað fíggjarnevndin løgtingsformannin um at leingja freistina at leggja fram álit í málinum, tí landsstýriskvinnan í orkumálum tann dagin hevði lovað nevndini, at hon fór at koma við einum broytingaruppskoti, og at nevndin saman við landsstýriskvinnuni í fíggjarmálum ger neyðugar útrokningar.

4-5 vikur

Fíggjarnevndin væntaði, at arbeiðið fór at taka einar 4-5 vikur, og bað um at fáa freistina at leggja álit fram longda til eftir páskir, t.e. eftir 1. apríl.

Løgtingsformaðurin eftirlíkaði umbønini um at leingja freistina.

Enn er einki álit komið, og á tingfundinum í gjár bað Kári P. Højgaard, sum legði uppskot fram, um at fáa málið aftur úr nevdini.

Løgtingsformaðurin boðaði frá, at tingið á einum seinni fundi fer at atkvøða, um málið skal takast úr fíggjarnevndini og koma aftur í tingið.

Kemur fyrsta dagin

Ruth Vang, forkvinna í fíggjarnevndini, sigur, at viðgerðin hevur drigið út, m.a. tí at fíggjarlógarviðgerðin var fyri, og tí fíggjarnevndin vildi hava uppskotið útgreinað, bæði hjá landsstýriskvinnuni í orkumálum og landsstýriskvinnuni í fíggjarmálum, samanborið við orkupolitikkin hjá landsstýrissamgonguni.

Álitið kemur fyrsta dagin, sigur Ruth Vang.